كنرجع نكتب هنا مللي كنكون بوحدي, و كنبغي نكتب لراسي باش نرتاح, مللي كنبغي نكون المرأة اللي بغيت بلا منتسنى لي جيم ديال الناس, و بلا منصاوب مكياجي و نلبس حوايج صغر مني باش نبان زوينة عامرة.
كنرجع باش نتفكر شكون انا وسط المازوخية اللي خاصني نمثل قدام اللي حواه الزمان, و السادية قدام الراجل اللي خاف يحويه الزمان, وجاي طالب نخشيه تحت رجليا باش نخبيه على مرتو و ولادو و المسؤولية اللي تابعاه كل نهار. نفيق البنت اللي أنا هي بالصح و الي كيفيقها فيا غير الجوانات, مللي كنغسل الروج بالروج و كنقابل السما و كنسول ربي علاش منقدرش نشوفو مللي كنكون تحت من الرجال ولكن كنشوفو مللي كنكون سكرانة, كنبغيه و كنسمعو مللي كنكون تحت السما فرمضان كتر مللي كنكون فالصف الأول ديال المصلين تحت البوق اللي مكيقدر يخليني نسمع حتى حاجة بصداعو, كيقيسني فالبلاصة اللي مازال ما قدر يقيسها حتى شي راجل مللي كتجي عيني فعينيه كتر مللي كنكون حاطة وجهي فالأرض حيت مكنقدرش من موراها نعرف واش غنهز راسي على وجه الله, ولا على وجه شي سادي اللي معندو غرض مللي كيخليني نحط وجهي فالأرض من غير يخليني نحس بللي مكيحس بحتى شفقة ولا عاطفة من جيهتي, علاش؟ مكنسولوش حيت جنتي هي فلوسو, و انا طامعة فالجنة وخا وجهي كيمسح الأرض.
شحال من مرة كنسول راسي شحال من واحد كان يقدر يهز راسو قدام واحد ذللو بلا سباب بحال اللي سول الملك حامل الضوء الله مللي آمرو باش يحط وجهو فالأرض : علاش؟ وايلا كان الله كاين غير فالزربية ديال الصلا, اما حامل الضوء هو اللي رسم النجوم اللي فالسما باش نقدرو نشوفو فيه الفوق؟