#3

كنت راجعة اليوم من عند صاحبتي فعين الذياب, و ركبت الطرام لأول مرة فحياتي, زوين حسن من الطوبيس, كيركبو فيه ناس نقيين و تأكدت مللي سمعت شوية ديال الفرونسي فالكراسى اللور, فكراتني الفرونسي فأول مرة هربت من الكاريان و جيت للمدينة, و كيفاش كانت كتخلعني, تخنقت فهاد الجو و حسيت براسي باغا نعاود لشي واحد, و لا باغا نكتب, و تفكرت هاد البلوج, واش خاصني نكتب هنا كلشي؟ سميتي و عمري و فين تزاديت؟ مازال خايفة حيت واخا كنكذبو على راسنا و كنقلو مكنسوقوش, كتبقى هدرت الناس هي المراية اللي كنشوفو فيها راسنا, واش نكتب من المذكرات ديالي اللي خلاوني نحس و انا ففراشهم؟ صعيب علينا نتفاهمو و انا كنكتب احاسيس و نتا كتقرا بورنو, لا الراجل ولا البنت كيقدر يفكر و هو داير يديه فسروالو, وصعيب عليا بزاف نعود نقرا أول مرة نعست مع واحد مكنعرفوش, و كيفاش عرفت الماسوشيزم,.

و لا نكتب باش نعاود نبيع راسي؟  هادشي اللي كنكتب هنا ديالي قبل ما يكون ديالك. 

محطة : ساحة محمد الخامس

الأنترنت بحال شي بحر كبير, كتفكرني الكتبة فيه بحال دوك القراعي اللي كيكتبو فيهم الرسائل و يلوحوهم فالبحر, يقدر يلقاها شي حد و يقراها, يقدر تلقاها شي صحفية و تكون سبب الشهرة ديالك بحال الفيلم "message in a bottle" و يقدر تبقا غير كتعوم حتى تغرق, داكشي علاش المهم هو تكتبها و ما تسناش منها شي حاجة, و المهم هما الحوايج اللي خلاتك تحس بيهم, انت.
فيقتي واحد المرة  كتسب ولدها حيت مضارب مع الكرسي يحيدو من بلاصتو معرفتش ايمتا طلعت بحال هاد المرة فكرتني فجارتنا سعيدة, هزيت عينيا فيهم لقيت الفرونسي كاملة نزلات, الطرام خايب كيركبو فيه غير الناس الخايبين.

محطة : عقبة بن نافع

حتى أنا بغيت ننزل فحالي.
نزلت و قالت ليا الشرفة "حضي أبنيتي راسك راه البراهش فجيهت مولاي رشيد خايبين" ما بقيتش عارفة شكون اللي خايب و شكون اللي زوين, واش أنا؟ و اللا الشارفة وولدها ؟ واللا اللي فجيهت مولاي رشيد؟ و اللا هي مقودة من عند محمد الخامس؟