#4

ايلا عطيتي بنت صغيرة حجرة و علمتيها لمدة 20 عام أن ديك الحجرة هي كلشي فحياتك, و ايلا عطيتيها لأي واحد غادي يخصك تندمي واخا يعطيك مقابلها حاجة زوينة, غتعيش عمرها كامل و هي مآمنة بيها, حيت حتى ايلا ماندماتش مللي عطاتها بسبب القيمة ديالها المادية, غادا تندم بسبب قيمتها المعنوية, تعلمو البنات بللي الجنس حرام عليهم, و تعلمو الولاد بللي هو حلال عليهم, البنت اللي تحوات تصيدات, و الراجل اللي حوى راجل, تعطاتها صفة المفعول به, و هو تعطاتو الفاعل, واخا بجوجهم حيدو الحوايج, و بجوج عاشوه, بجوج باسو, و بجوج غوتو قبل ما يجيبوه, و لكن حيت هي و حتى هو مآمنين بلي لحمها عندو قيمة, كان خاصو يخلص فلوس, حنا كاناخدو الفلوس باش نبيعو ديك الحجيرة, وهو كيخلص باش يحيد على راسو الذنب و باش يعوض ليك اللي خدا منك واخا ماخدا منك والو, وهادشي علاش كل درب فيه قحبة, حيت كنبيعو الهدرة, كاتبان ساهلة لشي ناس و صعيبة لآخرين  و حتى  واحد فيهم غالط.
و واخا هاكاك فمجتمع بحال ديالنا هادو فنظري أحسن الرجال أما أكثر الرجال تقحبين كيكذب عليك باش ياخذها فابور و هو عارف بللي اللي عطاتها فابور بسبب الحب هي من النوع ديال لبنات اللي كتسمع الهدرة, و هو عارف غادي يمشي و يخليها غارقة ف 20 عام أخرى ديال لتخربيق و الندامة و الويل.

حتى حاجة فهاد الدنيا ماعندها قيمة من غير الحوايج اللي تعطاتهم قيمة من عندك أنت و لا من عند المجتمع,
الرجولة هي ياخد منها الحجرة ولكن ايلا أي وحدة نعسات مع الدري اللي عجبها, بمعنى آخر حتى وحدة ماقبلات تلعب ماغايبقا للرجولة حتى معنى, و القحاب حتى معنى, و حتى دابا ماشي بزز عليك تلعبيها, متندمي على حتى حاجة,

كينين جوج ديال الأنواع ديال الجنس فالعالم كاين الجنس بالفلوس, و كاين بالمشاعر, 

الجنس بالفلوس كتمناي غير ايمتا يسالي, اللي بالمشاعر كتمناي عمرو يسالي, الأول واقعي بزاف كيشري ليك حوايج, و كيسكنك و يقدر يشري لك حتى طوموبيل كاين ايلا حتى قضا لك غرضات و ايلا كنتي بنت زوينة يقدر يشري لك كتوب زوينين, و التاني كيخليك تعرفي بللي الجنس هو علاش شريتي الحوايج, وقريتي الكتوب, و هو علاش كتدور الدنيا كاملة, و هو الدنيا كاملة.

داكشي علاش كاينين جوج أنواع ديال البنات, البنت الزوينة الظريفة اللي كتزوج و كاتولد و كتبغي ولادها و راجلها, و كاينة المرأة القوية, اللي كتشد مناصب عليا, اللي كتوقف على شغلها فالخدمة, و اللي كاتبان فالتلفزة و لا اللي كتخرج وليديها من الكاريان, اللي كتزوج بالراجل اللي بغات, اللولة فرحانة ولكن ندمات حيت ما قراتش, و حيت فالزنقة معندهاش سمية من غير : مرات فلان, وحيت حتى واليديها ماراضيينش بيها بالأخص نهار كترجع ليهم والتانية ندمات حيت قرات  ندمات حيت ما عندهاش راجل كيخصها تطفي الضوء و كتخبى باش تبوسو ما حد ولادهم ناعسين.

الأولة لعبات مع الطبيعة و الثانية لعبت بالطبيعة, المهم نتي لاعبة لاعبة,متندميش, سواء خدا منك شي حاجة حيت حتى نتي خذيتي, سواء تزوجتي حيت الزواج زوين.

معرفتش واش الدنيا زوينة حيت عطات لكل واحد منهم حاجة واخا خدات منو حاجة, ولا خايبة لنفس السباب, واش اللي خلقنا كيبغينا و لا كيكرهنا, ايلا كان الله و الشيطان كاينين, خاص يكون عندهم نفس القوة باش يكون التوازن هاكدا فالعالم, و فهاد الحالة سواء عبدتي الله ولا الشيطان, ما يهمش.