#13

كنرجع نكتب هنا مللي كنكون بوحدي, و كنبغي نكتب لراسي باش نرتاح, مللي كنبغي نكون المرأة اللي بغيت بلا منتسنى لي جيم ديال الناس, و بلا منصاوب مكياجي و نلبس حوايج صغر مني باش نبان زوينة  عامرة.

كنرجع باش نتفكر شكون انا وسط المازوخية اللي خاصني نمثل قدام اللي حواه الزمان, و السادية قدام الراجل اللي خاف يحويه الزمان, وجاي طالب نخشيه تحت رجليا باش نخبيه على مرتو و ولادو و المسؤولية اللي تابعاه كل نهار. نفيق البنت اللي أنا هي بالصح و الي كيفيقها فيا غير الجوانات, مللي كنغسل الروج بالروج و كنقابل السما و كنسول ربي علاش منقدرش نشوفو مللي كنكون تحت من الرجال ولكن كنشوفو مللي كنكون سكرانة, كنبغيه و كنسمعو مللي كنكون تحت السما فرمضان كتر مللي كنكون فالصف الأول ديال المصلين تحت البوق اللي مكيقدر يخليني نسمع حتى حاجة بصداعو, كيقيسني فالبلاصة اللي مازال ما قدر يقيسها حتى شي راجل مللي كتجي عيني فعينيه كتر مللي كنكون حاطة وجهي فالأرض حيت مكنقدرش من موراها نعرف واش غنهز راسي على وجه الله, ولا على وجه شي سادي اللي معندو غرض مللي كيخليني نحط وجهي فالأرض من غير يخليني نحس بللي مكيحس بحتى شفقة ولا عاطفة من جيهتي, علاش؟  مكنسولوش حيت جنتي هي فلوسو, و انا طامعة فالجنة وخا وجهي كيمسح الأرض.

 شحال من مرة كنسول راسي شحال من واحد كان يقدر يهز راسو قدام واحد ذللو بلا سباب بحال اللي سول الملك حامل الضوء الله مللي آمرو باش يحط وجهو فالأرض : علاش؟ وايلا كان الله كاين غير فالزربية ديال الصلا, اما حامل الضوء هو اللي رسم النجوم اللي فالسما باش نقدرو نشوفو فيه الفوق؟

Read More

#12

فالفايسبك حنا القحاب, المثليون, الملحدون, العدميون.. كاملين كنحسو براسنا عائلة وحدة, و كنحسو براسنا محميين من أي حاجة خايبة, بحال شي عائلة كبيرة واخا نكونو مختلفين, كل منشور كنستقبلوه بمناقشة, بالأسئلة والنقد , بعد المرات بالضحك, و لكن أهم من كلشي بالحب, حتى ايلا مقريناهش -يمكن نديرو جيم لا منديروهاش- و لكن كتبقى أي حاجة قالها واخا يكون صاحبك مستعد تموت مع اللي سبها واخا متكونش متفق معاها, كنتقاسمو بزاف ديال الحوايج فكل منشور,من بعد مدة كتولي تتسني ايمتا تمشي تكونيكطا تدخل مع اصحابك, و كتكتب اللي بغيتي كتسى راسك حتى كتضطر تخرج الصباح تتلاقا بالناس ديال الحياة اليومية.

الناس ديال الواقع فشكل, باردين, هدرتهم كثيرة و سطحية,

- شفتي هاديك القحبة ديال لبنى أبيدار سمعت بللي ملحدة كتاكل رمضان؟

- آه هادوك الرباعة أخويا فيهم غير القحاب و الزوامل.

ايلا كنتي اجتماعي كتكون ولفتي تصبغ راسك بشي لون آخر فبحال هاد الحالات و تنكر التورط ديالك فهاد الجماعات الفاسدة الغريبة العجيبة, ايلا كنتي انطوائي كدير راسك خنشة ديال الزبل و كتفضل ما تكومونطيش, و كتسنا ايمتا تمشي تكتبها لعائلتك فالفايسبوك باش يتبراو ليك من هادو اللي آذوك بهدرتهم, كيعنقوك افتراضيا حتى كتعيط ليك امك باش تعشا وكتفرقك عليهم, و كيوصل نص الليل باش ترجع توجد راسك نفسانيا للصباح.

بزاف منا مللي كيسمع للناس ديال الواقع كيفضل يعيش مخبي بحال الفيران, اللي نهار غيلقاوه غيقتلوه, كنعايرو الدين و االله و الملك و الناس باسمائهم و كناضلو و كنربربو, ماصايمينش و ماساكتينش و ما خايفينش و لكن فاللخر كنخرجو بوحدنا للزنقة و حنا خايفين, حتى ولينا كنتخيلو بللي ميمكنش نعيشو فشي عالم بلا سكيزوفينيا.

اليوم اكتشفو شي ملتحيين انني قحبة واكتشفو الفايسبوك ديالي, انا خايفة بزاف مكرهتش يعنقني شي واحد.

Read More

#11

تخيلي يكون بصاح؟ يكون الله ما كاينش شنو غاديا ديري ؟ منين غاديا تبداي .؟

واش غاديا تبدلي الاخلاق ديالك و المبادئ ديالك و لا غادا تبقاي كيفما نتي ؟ شكون نتي أصلا بلا الله و بلا دين لا ملة؟

ايلا ولدت اشنو غايخصني نقول ليه دابا؟

يمعقلتش ايمتا وصلت سولت راسي هاد الأسئلة اول مرة و لكن عارفة بللي مللي بديتهم, كان فات عليا الحال باش نرجع لور, حسيت بللي حطيت رجليا أول مرة فوق الكرة الأرضية اللي كتعوم فالسما, بوحدها بلا ملائكة كيسبحو ليها , و بلا شياطين كيوسوسو ليها, وبلا عينين كيشوفوها, غير بوحدهاغاديا فالظلام و ماتقدر تشوف حتى حاجة من غير اللي مضوي حداها, بالصح خرجت واحد الليلة من بعد هاد الأسئلة من بيتي فالسطح و هزيت راسيت للسما لفوق, قداش حنا صغار و قداش ماعارفين حتى حاجة, و قداش حنا عميين معرفينش حتى شنو مورا الظلام اللي موصلتش الشمس تضويه, بحال يلا تلفت على الطريق,

و لكن مللي حطيت رجليا فالأرض حسيت بحرية فشكل, بحال ايلا الكون كلو ديالي, نقدر نسمع أي حاجة من أي يهودي ولا مسيحي. من الزوامل من و القحاب, من أي واحد يقدر يهدر بلغتي بلا احكام بلا كره, وبلا ميخصني نفكر و هو كيهدر كيفاش نقنعو بالاسلام و و لا نقوليها غيجي معاك احسن الحجاب, حسيت بديك الانسانية اللي كيهدرو عليها الملحدين اللي كنت كنسحابهم منافقين و انهم عارفين الاسلام على حق و مبغاوش يعتانقوه.

مبقيت باغا نكدب حتى واحد ولا نتيق حتى واحد, بغيت غير نسمع, معتقدات الناس ولات بحال لموسيقى, كلها مشابهة و مختلفة, بحال شي تبويقة زويييينة من اللي كانت كتجيب ليا حياة, غير هي تبويقة مكتففيقش منها, حيت الأرض مازال كتمشي, و انا مازال ماشيا عليها, كنكتشفها, و كنكتشف راسي, و هاد شي كامل اللي فيا لداخل.

Read More

#9

مللي كيقوليك المؤمن بالله أن الله فوق المنطق ديال البشر

all your arguments are suddenly invalid.

و فالحقيقة ممكن يكون عندو الحق, على اش كيستند المنطق ديال الانسان أصلا, على الديكارتية؟ اللي كتبها المنطق ديال الانسان و بقينا فنفس الدائرة ؟

أولا,الناس كاملين كيتولدو فنفس الظروف, و كيربيو بعضياتهم, و كيقراو الكتب ديال بعضايتهم غالبا غيكونو متافقين على بزاف ديال الأفكار اللا منطقية, كاين بزاف ديال الاديولوجيات, بزاف من غسيل الدماغ, و من شي ضربة على راسك زعزعات ليك الطرقان فالسينابسات ديال دماغك, و بزاف ديال الحشيش و لا ال MDMA اللي خربقو المستقبلات فدماغك .

و بما انهم محاطين فنفس الكون فوسط المادة و الزمكان فان المنطق ديالهم مرة أخرى غادي يكون منحوت حسب اللي فرضو عليه التصور ديال هاد الصندوق اللي حنا فيه بما أنه مايمكنش نتخيلو راسنا خارج هاد ال Context.

الحاجة التالتة و هي الوعي ديالنا المحدود, بسبب الفيزيولوجيا ديال الدماغ, و اللي واخا كيبان لينا راسنا شي حاجة واعرة بسبب هاد الشويك ديال الوعي اللي عندنا, و لكن تخيل كيفاش غادي يكون كيفكر واحد عندو دماغ أكبر من ديالنا و أكثر تعقيدا من ديالنا, يمكن يعرف مفاهيم جديدة و يكون عندو ادراك مختلف بزاف, تخيل واحد معقد و اكبر بزاف, الدماغ ديالنا غايولي نطفة,ماعارفة والو من اللي تقدر تسميه منطق ديال الحقيقة المطلقة.

و هادشي في أحسن الأحوال أما في أسوء الأحوال ممكن ميكونش كاع شي حاجة سميتها منطق, و ممكن الحقيقة تكون أكبر من الرياضيات, حيت ممكن غاديا نعاود نقرا  هاد الجمل من بعد شهر و يجيني هادشي اللي كتبت ماشي منطقي أصلا, كيفما اينشتاين ضرب للبشر فأكثر حاجة كانت كاتبان ليهم ثابتة و منطقية : الزمن و المكان.

ممكن المنطق اللي أصلا كنعيقو بيه على الحيوانات يكون بحالو بحال الموسيقى, مللي كنقولو على شي نوع منها زوين, كنغلطو, حيت زوين و خايب مقياس شخصي, حنى اللي كنلبسوه لأي حاجة تبرمج دماغنا باش يشوفها بديك الطريقة.

سواء المؤمن ولا الملحد ولا الأرتودوكسي, حتى واحد منهم ما اختار الاعتقاد بالمسمى "المنطق", اختارو بالبرمجة اللي مبرمج عليها هو.

مللي كتقول لي مؤمن كتكون مآمن بالله اللي عطاك أجوبة على بزاف ديال الأسئلة الوجودية, أما مللي كتكون ملحد كتكون كتكون حتى هو """مآمن""" بالمنطق, اللي معندو أصلا حتى جواب على حتى حاجة, الأجوبة فالمنطق غير فخ كيحل ليك أسئلة أخرين.

فكلتا الحالتين كيخصك دير الثقة فواحد, يا إما الله, يا إما دماغك.

الله ماشي أهل للثقة, ايوا أما دماغك؟

Read More

#8

أش عند قحبة ما تكتب, من غير شحال من أح دارت, شحال كبير عندو و شحال الوقت صعيبة و كتهدر غير على شحال من مترو ديال الخرا لتحت, كنفكر فهادشي كل مرة حطيت يدي باش نكتب, كتبت شحال من سطر و مسحتهم, مغاديش يسمعو لهدرتي, المرة مكيسمعوش لهدرتها , و اللي أخيب من أنك تكوني مرا فالمغرب, هو تكوني مرة و قحبة.

نذير اللي بغيت, كان خاصها حتى هي ترجع شكيب عصفور باش يسمعو منها, كيتصدمو الرجال ملي كيعرفو واحدة كتقدر تهدر بحالهم, داكشي علاش عندها يمكن لفانز بزاف, كون دخلو الرجال لداخل العيالات و عرفو  فاش كيفكرو, كن هدرتهم تبدلات لينا, و علينا, غادي يتصدمو لشحال -وخا شعرنا طويل, و مقدهمش فالطول و فالعرض و كنتغنجو فالمشية- حنا كنتشبهو ليهم, 

غادي يبكيو على لحجاب و النقاب اللي كيبان زوين مللي كيشوفوه من برة, ولكن سخون فالصيف و كيعرق و كيخنق من لداخل,

غادي يتصدمو مللي غادين يلقاو راسهم واخا بنات كيكفتو تاني, و بللي باقين باغين يتفرجو فالبورنو, و بللي شحال من حاجة باقا بلاصتها غير ملي كيجي يخرجها, كتخرج بصوت زوين و رقيق مكيبانش قدام الغوات ديال الرجال حداه, و بللي الرجال حتى ملي كيسمعو صوتك كيتشهاو غير يخشيو تاعهم من البلاصة اللي خرج منو, و من بعد يلومونا حنى علاش مكنتهلاوش فدماغنا بالقرايا و كنتهلاو غير ففمنا بالعكر.

صاوبونا كيف بغاو و عايرونا علاش حنا هاكا, بحال كيف خلق الله الشيطان و تبرا منو و بغا يحرقو, واخا نبغيو حنا لبنات نخليوهم يدخلو داخلنا هما ما غادينش يبغيو, حتى راجل مكيرضا يتشبه بالمرا,و اللي تشبه بيها شماتة, ولكن لمرا كتمنى تولي راجل, كتكمي و كتشرب و كتحشش, وكتخسر الهدرة غير باش تقرب تولي راجل, و حتى مللي كتبان شي غوين فالمجتمع حتى واحد مكيعترض, بحال ايلا هاد الناس بغاو يحولو البنات كاملين رجال, و لكن غير "بحال" حيت مللي كتوصل وقت الفراش, ميكرهوش يرجعو كلشي عيالات, حيت الرجلة معنهاش قيمة ايلا مكاينش علامن تمارس, كيفما الله ماعندوش قيمة بلا شيطان.

 حاجة اخرى غادي يكتاشفوها الرجال مللي يدخلو فينا, بللي الشهوة اللي عظموها عندنا منها بالكيلوات لداخل, لمشية ديالو اللي كتحرك معها الأرض تحت منو, كتافو الواسعين اللي يعنق بيهم ثلاتة مني, رجليه و فخاضو اللي مرسومين بحال شي تمثال من تماثيل الآلهة الغريقية, و فاش كيقيس وجهي بيدين أطلس اللي هزوالعالم, و كيهزو وجهي جيهت لحيتو اللي كتقطر تستوستيرون, و عينيه اللي كيسكروني ملي كنشوف فيهم, غيطيحوني على ركابي ايلا زدت شفت فيهم دقيقة أخرى, كنسد عينيا باش منطيحش, كيصحابني كنمثل, كنتنفس الهوا باش نوقف, كنشم ريحتو بين يديه كنحس بلي ايلا هو طلبني نخلصو باش يقرب ليا غاديا نخلصو بفلوس الدنيل كاملة غير باش يعاو يقيسني,ولكن هو ماعارفش, داكشي علاش هو اللي كيخلص, خليها هاكا, مخرجني الحساب.

Read More

#7

مللي كتكوني موظفة ولا مهندسة كتكون عندك تصويرة للمستقبل ديالك كيف غادي يكون, كتخيلي راسك ف 60 عام مستقلة, و كاتاخدي تقاعد, كتفكري بللي غاديا ديري الحوايج للي ماكانش عندك الوقت ديريهم دابا, فالسفر, الجبال و البحر, و فالكتابة ديال التجارب ديالك, فالرسم, كتبان ليك التصويرة زوينة بحال داك الطابلو اللي غاديا ترسمي, و مللي كتكوني مزوجة, كتخلي الطابلو يرسموه ليك بناتك و ولادك و راجلك, كتخليهم يطبعو بلاصتهم فيه حيت كاتيقي فيهم الثقة الكاملة, بحال الطبيبة اللي كتستثمر فالتأمين الصحي, نتي كتستثمري فناس آخرين, و عندك الحق حيت من بعد كنشوفك حتى نتي فرحانة, و الصورة ديالك عامرة ببزاف ديال الناس اللي غادين يكونو دايرين بيك حتى طفى شمعتك فهاد الدنيا.

مللي كتقرري تكوني هاريبة, كتشوفيهم حداك, زوينات و صغيرات و معكرات, حسن من جاراتكم كاملين, كتحسي بيهم بحال ايلا معمرهم غادين يكبرو ولا يخيابو, مللي كيكون الفم الصغيور, و الصدر الواقف, و الشعر الكحل هما اللي معيشينك, و نتى عارفاهم مادايمينش, عارفة الفم غادي يكبر, و الصدر غادي يطيح, و الشعر غادي يقلال و يبياض, مكتعرفيش فين غادا تسالي قصتك, بحال هاد البلوغ اللي معرفتوش كيفاش غادي يسالي, كتبان ليك تصويرة خاوية, ما فيها حتى لون و حتى شكل, و قليل فين كنسمعو على العاهرات من بعد, واش كيبقاو فنفس البورديل حتى كيتعفنو و كيمرضو و  كيموتو, ولا كيديرو الفلوس و كيبدلو الحرفة, ولا كينتاحرو,معرفتش و حتى واحد معارف بحالنا بحال السرباية فالقهاوي, و العيالات فالموقف,ما وصلناش نكونو بنادم اللي كنخدمو ليه, بحالنا بحال العازل الطبي, عندنا مدة صلاحية, و كنتلاحو فالزبل, و بيناتنا شكون اللي كيمشي يتتبع الزبل فين وصل مللي كنكونو سالينا منو.

أنا راكبة هاد الطوبيس و معرفاش فين غادة, و كنشوف لبنات اللي معاية كتبان لي حتى وحدة معارفة بالظبط لفين, غير اللي عارفاه أنا هو الناس من برا الطوبيس ماباغينش يعرفونا, و يشوفو فينا, و كيقلبو الوجوه لولادهم باش مايشوفوش جيهتنا, واخا هما عارفين بللي خاصنا نكونو, و باغيننا نكونو,و كون كانو كاع البنات عفيفات و محجبات و طاهرات كون نقارضو لمشاش من الزنقة, معليش ايلا كنا كنموتو حنا, باش يعيشو لمشيشات.

Read More

#6

مللي كنكون بوحدي فالدار فالليل بعض المرات كنتشهى تكون حدايا بنت جارتنا نورة, بنيتة زوينة و كنت عزيزة عليها بزاف, كنتشهى بزاف نشوفها لدرجة أني كنتخيلها ناعسة فبيت النعاس ديالي, و كنشوف قبالتها كيبانو لي قراعي خاويين كنفكر نوض نخبيهم.
 بحال شي حمقة بعض المرات كنقيس كرشي كنتخيل راسي حاملة, تخيلي تكوني حاملة؟ عارفة بللي ميمكنش و لكن نقدر نتخيل, داكشي علاش كنشوفها , مللي كنكون سكرانة, كنتخيل عويناتها كحلين بحال عينيا, و يديها بيضين و صغيورين, و لكن مكنقدرش نهدر معاها, حيت, معرفتش شكون خلقنا و علاش حنا كاينين, معرفتش فين كنمشيو مللي كنموتو, معرفتش علاش خاصنا نكونو زوينين و منكونوش خايبين و منسرقوش رايبي لشي بنت أصلا عندها منو بزاف, علاش صحاباتها فالمدرسة كيبغيو الله و غايديهم للجنة و هي اللا, معرفتش علاش هما عندهم باباهم و هي اللا, و معرفتش واش ماماهم حسن مني, و لا أنا حسن منهم, واخا كلشي كيشوف فيا شوفة ناقصة.

مللي تكبرمعرفتش واش خاصني نخليها تلبس بحالي, و تمشى بحالي, و تعكر بحالي, ايلا درت هاكا غادا نكون خرجت عليها و خليتها تبكي بزاف بسباب المجتمع و غنكون ظلمتها, و ايلا حببتها فالحجاب والدين غاديا نكون كنكذب عليها وعلى راسي,معرفتش واش نخليها تصاحب مع اللي بغات, و تنعس مع اللي بغات, ايلا درت هكا غادا نكون خلقت قحبة أخرى,

 بنتي, قحبة؟!, غنحوي مك لا عاودتيها,

ولكن علاش بغيتها لراسي و مبغيتهاش ليها هي؟ واش أنا فرحانة بهادشي اللي كندير؟ آه و يمشي يتقود المجتمع, ولكن علاش باقا كتضر.

واش الشراب و الحشيش زوينين ولا خايبين؟ معرفتش.

مكرهتش نتعلم منها هي شنو معنى الحياة كاملة, العالم ديال الناس لكبار معقد بزاف, و خايب بزاف, بغيت نرجع و نكون صاحبتها فالابتدائي, و نسمع منها شنو كتقول عليا فاش كنت ماماها.

ماما, واش نتي زوينة ولا خايبة؟  يمكن هادي بوحدها اللي نعرف نجاوبك عليها زوينة, بزاف, داكشي علاش كنتعدب, و داكشي علاش مولدتكش, ما بغيتكش تعدبي معايا.

القراعي باقين قدامي و هي مشات, 

ماكاين لاش باش نجمعهم دابا.

Read More