#7

مللي كتكوني موظفة ولا مهندسة كتكون عندك تصويرة للمستقبل ديالك كيف غادي يكون, كتخيلي راسك ف 60 عام مستقلة, و كاتاخدي تقاعد, كتفكري بللي غاديا ديري الحوايج للي ماكانش عندك الوقت ديريهم دابا, فالسفر, الجبال و البحر, و فالكتابة ديال التجارب ديالك, فالرسم, كتبان ليك التصويرة زوينة بحال داك الطابلو اللي غاديا ترسمي, و مللي كتكوني مزوجة, كتخلي الطابلو يرسموه ليك بناتك و ولادك و راجلك, كتخليهم يطبعو بلاصتهم فيه حيت كاتيقي فيهم الثقة الكاملة, بحال الطبيبة اللي كتستثمر فالتأمين الصحي, نتي كتستثمري فناس آخرين, و عندك الحق حيت من بعد كنشوفك حتى نتي فرحانة, و الصورة ديالك عامرة ببزاف ديال الناس اللي غادين يكونو دايرين بيك حتى طفى شمعتك فهاد الدنيا.

مللي كتقرري تكوني هاريبة, كتشوفيهم حداك, زوينات و صغيرات و معكرات, حسن من جاراتكم كاملين, كتحسي بيهم بحال ايلا معمرهم غادين يكبرو ولا يخيابو, مللي كيكون الفم الصغيور, و الصدر الواقف, و الشعر الكحل هما اللي معيشينك, و نتى عارفاهم مادايمينش, عارفة الفم غادي يكبر, و الصدر غادي يطيح, و الشعر غادي يقلال و يبياض, مكتعرفيش فين غادا تسالي قصتك, بحال هاد البلوغ اللي معرفتوش كيفاش غادي يسالي, كتبان ليك تصويرة خاوية, ما فيها حتى لون و حتى شكل, و قليل فين كنسمعو على العاهرات من بعد, واش كيبقاو فنفس البورديل حتى كيتعفنو و كيمرضو و  كيموتو, ولا كيديرو الفلوس و كيبدلو الحرفة, ولا كينتاحرو,معرفتش و حتى واحد معارف بحالنا بحال السرباية فالقهاوي, و العيالات فالموقف,ما وصلناش نكونو بنادم اللي كنخدمو ليه, بحالنا بحال العازل الطبي, عندنا مدة صلاحية, و كنتلاحو فالزبل, و بيناتنا شكون اللي كيمشي يتتبع الزبل فين وصل مللي كنكونو سالينا منو.

أنا راكبة هاد الطوبيس و معرفاش فين غادة, و كنشوف لبنات اللي معاية كتبان لي حتى وحدة معارفة بالظبط لفين, غير اللي عارفاه أنا هو الناس من برا الطوبيس ماباغينش يعرفونا, و يشوفو فينا, و كيقلبو الوجوه لولادهم باش مايشوفوش جيهتنا, واخا هما عارفين بللي خاصنا نكونو, و باغيننا نكونو,و كون كانو كاع البنات عفيفات و محجبات و طاهرات كون نقارضو لمشاش من الزنقة, معليش ايلا كنا كنموتو حنا, باش يعيشو لمشيشات.